2014-жылдын 17-декабры күнү саат 16:00 чамасында Ала-Арча дарыясында муз  топтолуп, суу нугунан ашып кеткен.

Биринчи май району.  Малдыбаев жана Жаманбаев көчөлөрүнүн кесилишинде тосмодо көлөмү 12 миң м³ муз топтолуп, Токтоналиев көчөсүндө жайгашкан  “Илим” орто мектебинин аянтын суу каптаган. Муз каптоонун кесепетин жоюуга “Жашылдандыруу” ишканасынан 7 адам, Юстиция министрлигинен 12 адам тартылып, муз тоңгон жер ачылып суу агымы өз нугуна түшкөн.

Ленин району.Жибек-Жолу көчөсүндө жайгашкан автоунаа өтүүчү көпүрөдө муз топтолгон. Жумушка “Бишкек сууканал” ишканасынан 1 эксковатор,  “Жашылдандыруу” ишканасынан 1 эксковатор, 2  трактор жана 15 адам тартылып, тазалоо иштери жүргүзүлгөн.

Ошондой эле Рыскулов көчөсүндө жайгашкан №538 турак үйдү суу каптаган, ӨКМнин Бишкек шаардык Куткаруу кызматынын куткаруучулары жашоочулардын буюмдарын чыгарууга жардам беришкен.

Октябрь району. “Совмин” кичи районунда №4 жана №12 үйдүн аралыгында жайгашкан жөө адамдар өтүүчү көпүрө бузулган.

Ала-Арча дарыясынын кооптуу аймактары көзөмөлгө коюлду.

Мындан ары Министр Кубатбек Боронов жарандарга, турак-жайларга жана социалдык обектилерге коркунуч келтирбөө үчүн ӨКМнин Бишкек шаардык башкармалыгынын башчысы Аманбаев  Болотбек Жалиловичке тапшырма берди.