Кыргыз Республикасынын Жогорку Кеңешинин  Адам укуктары, конституциялык мыйзамдар жана мамлекеттик түзүлүш боюнча комитетинин төрайымы Наталья Никитенко менен Жогорку Кеңештин регламенти жана депутаттык этика боюнча комитетинин төрайымы Айнуру Алтыбаева 19-февралда Европа коопсуздук кызматташтык уюмунун (ЕККУ) Демократиялык институттар жана адам укуктары боюнча бюросунун (ДИАУБ) эксперттери Э.Томас, А.Пейдж, О.Тжаскальса-Строинска жана Ф.Пиана менен жолугушту. Жолугушууга көз карандысыз улуттук эксперттер дагы катышты.

Жолугушууда мыйзам чыгаруу жол-жоболору жана ченемдерди иштеп чыгууга байланыштуу маселелер талкууланды. Ошондой эле жолугушуунун катышуучулары тарабынан парламенттик процедураларды өркүндөтүү жана Жогорку Кеңеш тарабынан кабыл алынган чечимдердин сапатын жогорулатууга багытталган сунуш-пикирлер айтылды. Эксперттерди мыйзам долбоорлорун лингвистикалык экспертизадан өткөрүү механизмдери кызыктырды.

Соңунда тараптар жогоруда белгиленген багыттар боюнча кызматташууну улантуу боюнча ой-пикирлерин билдиришти деп билдирет  Жогорку Кеңештин Басма сөз кызматы.